Äs in´t Jaohr 795 de hillige Liudger in Mimigernaford haug up den Knapp üöwer de Ao, wao vandage de Dom steiht, den Grundsteen för´n Klauster lagg, was daomet de nieë Name för den Plass vüörprogrammeert; denn uut dat latinske Word MONASTERIUM, dat in de Griekenspraoke siene Wuordeln hät un KLAUSTER bedütt, wuor met de Tied de Name för de Stadt, in de wi alle mähr off auk weiniger gärne liäwt: Münster.
Nu is jä in de leste Tied ´ne Diskussion uutbruoken, wat m´, üm för Besökers use Metropolis Guestphaliae no attraktiver to maken un üm to informeren, wat m´ süss no wull up dat Ortsschild setten könn. Dao giff et satt Vüörsliäge, tom Bispiël „Stadt des Westfälischen Friedens“, „Stadt der Wissenschaft“, „Stadt der Lebensart und Kultur“, „Lebenswerteste Stadt der Welt“. Ick schrief no en paar drto: „Vorort der westfälischen Hanse“, „Hauptstadt des Landesteils Westfalen“ oder „Hauptstadt Westfalens“ - dao könn m´ dann dat Westfaolenpiärd no springen laoten -, „Vierflüssestadt“ (wiägen Angel, Iëmse, Wärs un Ao), „Schlaunstadt“ un „Wiedertäuferstadt“.
